08 វិច្ឆិកា 2012
សរសេរសម្រួលដោយ អ៊ូ ធក់
វ៉ាស៊ីនតោន៖ ប្រធានាធិបតី បារ៉ាក អូបាម៉ា
បានយកជ័យជម្នះក្នុងការបោះឆ្នោតសម្រាប់អាណត្ដិទី២ ជាប្រធានាធិបតី
ក្រោយពីយុទ្ធនាការដ៏ស្វឹតស្វាញទល់នឹងគូប្រជែងពីគណបក្សសាធារណរដ្ឋ
លោកមីត្ត រ៉មនី។ លោក អូបាម៉ា
នៃគណបក្សប្រជាធិបតេយ្យបានទទួលការគាំទ្រពីរដ្ឋដែលមានការប្រកួតដ៏
តានតឹង ដូចជារដ្ឋខាឡូរ៉ាដូ (Colorado), មីឈីហ្គែន (Michigan)
និងរដ្ឋវើជីញា (Virginia)។
ខណៈដែលរដ្ឋនីមួយៗប្រកាសការរាប់សន្លឹកឆ្នោតសរុប លោក អូបាម៉ា
បានទទូលសំឡេងប្រតិភូលើសពី២៧០ដែលជាសំឡេងត្រូវការដើម្បីឈ្នះ
តំណែងប្រធានាធិបតី
ក្រោយពីលោកបានទទួលការគាំទ្រពីរដ្ឋដែលមានការប្រកួតប្រជែងយ៉ាង
ស្វិតស្វាញដូចជារដ្ឋអូហៃយ៉ូ (Ohio) និងរដ្ឋដទៃមួយចំនួនទៀត។
នៅក្នុងសុន្ទរកថាជ័យជម្នះរបស់លោកនៅក្រុងឈីកាហ្គោ
លោកបានសច្ចាថានឹង ចាត់វិធានការជាវិជ្ជមាន
មិនមែនគ្រាន់តែនិយាយបែបនយោបាយទេ។
«ក្នុងពេលប៉ុន្មានសប្ដាហ៍ និងខែខាងមុខនេះ
ខ្ញុំនឹងទាក់ទងនិងសហការជាមួយមេដឹកនាំនៃគណបក្សទាំងពីរ
ដើម្បីដោះស្រាយបញ្ហា ដែលត្រូវការគណបក្សទាំងពីរចូលរួម
ដែលបញ្ហាទាំងនោះរួមមាន ការបន្ថយអតិផរណា
កំណែទម្រង់ប្រព័ន្ធពន្ឋដារ កែលម្អប្រព័ន្ធអន្ដោប្រវេសន្ដ
ការឈប់ពឹងពាក់ប្រេងបរទេស។
យើងនៅមានកិច្ចការជាច្រើនទៀតដែលត្រូវធ្វើ»។
រហូតមកត្រឹមព្រឹកថ្ងៃពុធ
គម្លាតនៃចំនួនស្លឹកឆ្នោតមិនសូវធំប៉ុន្មានទេ
ដោយលោកអូបាម៉ាទទួលបានត្រឹមតែជាង៥០ភាគរយ
ខណៈដែលការរាប់សន្លឹកឆ្នោតនៅតែបន្តនៅឡើយ។
ប៉ុន្តែសន្លឹកឆ្នោតប្រតិភូ មានភាពជាក់លាក់ ទោះបីជាលោក រ៉មនី
ទទួលជ័យជម្នះក្នុងរដ្ឋដែលមានការប្រកួតប្រជែងដ៏ស្វិតស្វាញមួយ
ចំនួនដូចជារដ្ឋ ណដ ខារ៉ូឡានា (North Carolina) និងរដ្ឋភាគខាងត្បូង
តំបន់ខាងលិចកណ្តាល និងខាងលិច រាប់ទាំងរដ្ឋ អ៊ីនឌីយ៉ាណា (Indiana)
ខានសាស (Kansas) មីស្ស៊ូរី (Missouri) តិចសាស (Texas) និងរដ្ឋអារីហ្សូណា
(Arizona)។
ប្រព័ន្ធបោះឆ្នោតសហរដ្ឋអាមេរិកផ្ដល់ជ័យជម្នះយោងទៅតាមលទ្ធផលក្នុង
រដ្ឋ មិនមែនតាមចំនួនសំឡេងឆ្នោតទូទៅទេ។
លោក រ៉មនី បានទទួលយកបរាជ័យក្នុងការប្រកួត ពីទីក្រុងបូស្ដុង
ដោយលោកបានថ្លែងថា លោក
បានទូរសព្ទទៅលោកប្រធានាធិបតីដើម្បីសាទរលោក បុគ្គលិក និង
ក្រុមអ្នកគាំទ្ររបស់លោកប្រធានាធិបតី។
«ខ្ញុំបានជូនពរដល់អ្នកទាំងអស់គ្នា ជាពិសេសប្រធានាធិបតី
ស្រ្តីទី១ និងកូនស្រីរបស់លោក។
នេះជាពេលវេលាប្រកបដោយការប្រឈមដ៏ធំធេងរបស់សហរដ្ឋអាមេរិក។
ខ្ញុំបន់ស្រន់សុំឲ្យប្រធានាធិបតីទទួលជោគជ័យក្នុងការដឹកនាំប្រទេស
ជាតិយើង»។
លោករ៉មនីក៏បានថ្លែងព្រមានប្រឆាំងជម្លោះរវាងគណបក្សនៅពេលដែល
ប្រទេសកំពុងមានវិបត្តិ
ដែលពេលនេះគឺជាពេលដ៏សំខាន់សម្រាប់ប្រទេសជាតិ។
ចំពោះយុទ្ធនាការរបស់លោក រ៉មនី
បញ្ហាគន្លឹះនៃការបោះឆ្នោតគឺសេដ្ឋកិច្ចទន់ខ្សោយ និង
អត្រាអ្នកអត់ការងារធ្វើខ្ពស់ដែលបន្តមាន។
អត្រាអត់ការងារធ្វើរបស់ជាតិស្ថិតនៅជិត៨ ភាគរយ តែប្រធានាធិបតី
អូបាម៉ា បានអះអាងថា សេដ្ឋកិច្ច
សហរដ្ឋអាមេរិកបានប្រសើរជាងមុនហើយរដ្ឋបាលរបស់លោកបានជួយ
បង្កើតការងារច្រើន។
នៅទីក្រុងឈីកាហ្គោ ប្រធានាធិបតី ថ្លែងថា អនាគតរបស់ប្រទេសនឹងមិនប៉ះពាល់ទេ។
«ខ្ញុំមានជំនឿថា យើងទាំងអស់គ្នា
អាចរៀបចំអនាគតប្រទេសយើងឲ្យបានប្រសើរឡើង
ពីព្រោះយើងមិនបែកបាក់គ្នាទេ ដូចបង្ហាញនៅក្នុងនយោបាយនោះ។
យើងមិនអាក្រក់ដូចអ្នកខ្លះមានជំនឿនោះទេ។ យើងមានមោទនភាព
មានមហិច្ឆតា ហើយយើងមិនមែនបែកបាក់គ្នា
ដូចពណ៌នៃរដ្ឋទាំង៥០នៅលើផែនទីដែលតំណាងគណបក្សប្រជាធិបតេយ្យ
និង គណបក្សសាធារណរដ្ឋនោះទេ។
យើងទាំងអស់គា្នជាជាតិតែមួយគឺសហរដ្ឋអាមេរិក។
អ្នកបោះឆ្នោតទូទាំងសហរដ្ឋអាមេរិកបានបោះឆ្នោតយល់ព្រមលើ
វិធានការចំនួន១៧០ ដោយអនុញាតអាពាហ៍ពិពាហ៍រវាងមនុស្សភេទដូចគ្នា
នៅក្នុង រដ្ឋ ម៉េន (Maine) និងម៉ារីលែនដ៍ (Maryland) ហើយបានគាំទ្រ
ការប្រើប្រាស់កញ្ឆា សម្រាប់ដើម្បីកំសាន្ត នៅក្នុងរដ្ឋ ខូឡូរ៉ាដូ
និងរដ្ឋវ៉ាស៊ីនតោន ដោយចាត់ទុករដ្ឋទាំងនោះ ចម្លែកពីគេ
មិនស្របទៅតាមច្បាប់សហព័ន្ធប្រឆាំងគ្រឿងញៀន។
ទោះបីជាដឹងលទ្ធផលហើយក៏ដោយ
ក៏ការរាប់សន្លឹកឆ្នោតនៅតែបន្ដពេលនេះដែរ។ ៚